No fin de semana do 6 ao 8 de xuño desprazámonos á vila portuguesa de Esposende para participarmos na décimo cuarta edición do seu Encontro de Embarcações Tradicionais e terceira do seu Festival Náutico.
A asociación Forum Esposendense organiza o evento, que nesta edición contou con un nutrido programa de actividades que incluíu palestras, proxeccións, actuacións musicais e actividades infantís.
Naturalmente, tampouco faltou a navegación nas augas do Rio Cávado. Diversas embarcacións tradicionais galegas e portuguesas batallaron coa forte corrente e o vento de proa entre bancos de area que atraparon máis dun leme, incluíndo o da Barola. O resultado foi unha emocionante e esixente singradura e unha grande satisfacción ao conseguirmos cubrir o cuarto de milla entre o Centro de Atividades Náuticas e a Estação de Socorros a Náufragos, sede do Museu Marítimo.
Cabe destacar a participación da catraia Santa Maria dos Anjos, que gobernada pola experta tripulación local deu unha lección de navegación fluvial mesmo na xornada do domingo, mentres o empeoramento das condicións nos levaba a outras a buscar refuxio.
Debemos mencionar tamén a extrema hospitalidade do Forum Esposendense e demais entidades colaboradoras, que nos acolleron cos brazos abertos e nos brindaron un fin de semana repleto de comodidades e boa gastronomía.
Deixa unha resposta